Psixi pozğunluq
Beynəlxalq səviyyədə aparılan araşdırmalar göstərir ki, dünyada milyonlarla insan psixi və davranış pozuntularından əziyyət çəkir. İnsanların davranışlarında, hisslərində dəyişikliyə səbəb olan psixi pozğunluq daha çox gənc və orta yaşda olan insanlarda müşahidə olunur.
Statistikaya görə hər il dünyada bir milyona yaxın insan intihar edir. 25 milyon insan şizofreniyadan, 38 milyona yaxın insan epilepsiyadan əziyyət çəkir. 200 milyona yaxın insan isə yaşadığı ömründə ən azı bir dəfə depressiyaya düşür. Lakin buna baxmayaraq, bir çox insanlar psixi pozğunluğu olan yaxınları barəsində ətrafda duyulmaması üçün məlumatın gizli saxlanmasını istəyirlər.
Neyroinkişaf pozğunluqları,anskiyete pozğunluqları, travma və stress, qidalanma, yuxu, asılılıqlar, şəxsiyyət pozğunluqları da psixi pozğunluqlara aiddir.
Psixi pozğunluqların səbəbləri nələrdir?
İnsanların zehnində yaşadıqları, bəzən fiziki əlamətlərindən daha çox ağırlaşan və emosional dünyalarına ciddi şəkildə təsir edən bir çox psixi sağlamlıq pozğunluqlarının səbəbi hələ də dəqiq bilinmir. Amma, edilən müşahidələr və aparılan sorğular nəticəsində bioloji,sosial amillərin insanlarda psixi pozğunluqların yaranmasına səbəb olduğu müəyyən edilmişdir.
Psixi pozğunluqların müalicəsi
Psixi pozğunluqların müalicəsi psixoloq seansları və ya dərman üsulları ilə edilir.
Psixoterapevtlər fiziki və zehni problemlərin öhdəsindən gəlmək üçün müxtəlif psixoloji üsullardan istifadə edirlər. Bunlara misal olaraq, məşqlər etmək və ya mütəmadi danışmaq mütəxəssislərin seçdiyi müalicə yollarından biridir. Bu üsullardan istifadə edərkən əsas məqsəd insanların qorxusunu, problemlərini, xoşagəlməz xüsusiyyətlərinin yüngülləşdirilməsi və ya aradan qaldırılmasıdır.
Psixoterapiya bu üsulları əhatə edir:
- Dəstəkləyici psixoterapiya
- Rasional psixoterapiya
- İdrak, davranış terapiyası
- Hipnoterapiya
- Humanist terapevtik üsullar
Psixi pozğunluqların aradan qaldırılması, onlara qarşı müqavimət insanın özündən, fiziki və ümumi psixi xüsusiyyətlərindən asılıdır. İnsanlar zehni sıxıntılara qarşı fərqli reaksiyalar verir. Onların bəziləri tez, asanlıqla sağalarkən, bəziləri isə psixi pozğunluqlarından əziyyət çəkir.